Eyjar.net - upplýsinga- og fréttamiðill um Vestmannaeyjar - Fréttir - Uppsveifla frá aldauða í Eyjum

Staðan á pysjum sem komast á legg úr lundavarpinu í ár virðist ætla að vera svipuð og í fyrra þegar litið er á heildarmyndina yfir landið að sögn Erps Snæs Hansen hjá Náttúrustofu Suðurlands.

„2011 var mun verra ár víðast hvar um landið eins og sést á súluritinu yfir varpárangurinn. Þá komust engir ungar á legg víða. Árangurinn nú virðist ætla að vera betri á þeim stöðum þar sem allt drapst í fyrra en á móti dregst hann saman annars staðar,“ segir Erpur.

 

Í ítarlegri umfjöllun um lundavarpið í Morgunblaðinu í dag segir, að svo virðist sem allir ungar hafi drepist í Papey í sumar en í Vestmannaeyjum kemur árangurinn mest á óvart, þar er uppsveifla frá aldauða. „Í júlí var helmingurinn dauður í Papey og að sögn heimamanna er gríðarlegt magn þar af dauðum pysjum núna,“ segir Erpur.