Eyjar.net - upplýsinga- og fréttamiðill um Vestmannaeyjar - Fréttir - Tryggvi Guðmunds fær leyfi til að ræða við önnur félög

Tryggvi Guðmundsson, leikmaður ÍBV, hefur fengið leyfi hjá félaginu til að fara í samningaviðræður við önnur félög. Tryggvi braut agareglur liðsins á Þjóðhátíð á dögunum var í kjölfarið settur í tímabundið bann hjá félaginu.

Tryggvi hefur æft með ÍBV undanfarna daga en hann er ekki í hópnum gegn KR í síðustu viku né gegn Fylki um helgina.

 

Í viðtali við Fótbolta.net í fyrradag sagðist Tryggvi vera farinn að hugsa um næsta tímabil en hann mun yfirgefa herbúðir ÍBV þegar samningur hans rennur út í október. Tryggvi getur nú hafið viðræður við önnur félög en hann er meðal annars opinn fyrir þeim möguleika að vera spilandi aðstoðarþjálfari í fyrstu deild.

 

,,Ég er búinn að fá grænt ljós frá formanninum að ræða við önnur lið varðandi næsta ár," sagði Tryggvi við Fótbolta.net í morgun.

 

,,Það er ágætt að vera búinn að fá leyfi til að ræða við klúbba því að þetta er heils árs sport og menn fara aftur af stað í október og nóvember. Þetta er því gott til að maður geti farið strax af stað með nýju liði."

 

Tryggvi mun æfa með ÍBV út tímabilið en þó er ólíklegt að hann muni spila með liðinu.

 

,,Ég klára þennan eina og hálfa mánuð sem eftir er af tímabilinu með ÍBV. Ég stend mína plikt út tímabilið," sagði Tryggvi.