Eyjar.net - upplýsinga- og fréttamiðill um Vestmannaeyjar - Fréttir - Maður verður að taka afleiðingunum eftir svona skitu

,,Þetta er gríðarlega svekkjandi en maður verður að taka afleiðingunum eftir svona skitu," sagði Eyþór Helgi Birgisson við Fótbolta.net í kvöld eftir að ÍBV rifti samningi sínum við hann.

 

yþór Helgi braut agareglur félagsins í annað skipti í sumar á Þjóðhátíð um helgina og í kjölfarið ákvað ÍBV að rifta samningi sínum við framherjann.

 

,,Auðvitað sér maður eftir svona atvikum, ef maður myndi ekki sjá eftir svona löguðu þá væri eitthvað að. Ég vil biðja alla sem koma nálægt ÍBV afsökunar á hegðun minni."

 

Eyþór Helgi gekk fyrst til liðs við ÍBV um mitt sumar 2009 og hann spilaði einnig með liðinu 2010. Eyþór lék með uppeldisfélagi sínu HK í fyrra áður en hann gekk aftur í raðir ÍBV síðastliðinn vetur. Hann segir sárt að kveðja ÍBV á þennan hátt.

 

,,Það er leiðinlegt að enda þetta svona. Ég á eftir að sakna strákanna í hópnum enda eru þeir allir toppmenn og áhorfendurnir hafa líka alltaf staðið við bakið á manni. Ég á ekki eftir að sakna annarra úr Eyjum."

 

Félagaskiptaglugginn lokaði í síðustu viku og því er ljóst að Eyþór Helgi getur ekki fundið sér nýtt félag fyrr en í vetur. Hann mun því ekki spila fleiri fótboltaleiki í sumar.

 

,,Það er svakalega svekkjandi. Maður verður bara að halda sér í formi og leita eftir liði til að æfa með í bænum. Þetta er kannski ekki mikil tilbreyting fyrir mig að fara í annað lið og æfa. Ég er ekki búinn að fá að spila mikið þannig að þetta er ekki mikið öðruvísi nema með öðrum strákum," sagði Eyþór sem ætlar að íhuga sín mál vel áður en hann finnur sér nýtt félag fyrir næsta tímabil.

 

,,Ég ætla að hugsa vel um þetta og ætla að skoða öll mál vel og vandlega. Ég ætla að taka mig sjálfan í gegn og skoða þessi mál vel og vandlega," sagði Eyþór að lokum.