Eyjar.net - upplýsinga- og fréttamiðill um Vestmannaeyjar - Fréttir - Færri sérsveitarmenn á Þjóðhátíð

Fækkað verður um einn sérsveitarmann í lögregluliði Þjóðhátíðar frá hátíðinni í fyrra. Formaður Þjóðhátíðarnefndar segir að til greina komi að nefndin borgi meira í löggæslukostnað, haldi ríkið áfram að minnka framlag sitt til löggæslu á hátíðinni.

Búist er við að gestir verði um 14.000 og hátíðin sú næststærsta frá upphafi. Vegna nauðgana á hátíðinni í fyrra hefur Þjóðhátíðarnefnd sett upp 11 eftirlitsmyndavélar í Herjólfsdal. Páll Scheving Ingvarsson, formaður Þjóðhátíðarnefndar, segir að hægt sé að greina einstaklinga af myndum þeirra.

 

Samkvæmt heimildum fréttastofu munu tveir sérsveitarmenn standa vaktina á Þjóðhátíð í tvær nætur, en í fyrra voru þeir þrír í þrjár nætur. Tveir fíkniefnahundar verða á hátíðarsvæðinu. Lögreglumenn með þeim verða færri en í fyrra. Páll Scheving segir það slæmt að fíkniefnaeftirlit verði veikara á hátíðinni í ár. Þess ber að geta að fjölgað var um einn sérsveitarmann fyrir tveimur árum þegar stefndi í methátíð í Eyjum.

 

Ekki náðist í sýslumanninn í Vestmannaeyjum í dag. Fyrir tveimur árum sagði hann að löggæslukostnaður vegna hátíðarinnar væri tæplega sjö milljónir króna og að Þjóðhátiðarnefnd borgaði um helming þeirrar upphæðar.

 

Formaður nefndarinnar bendir á að 120 manns eru í gæslu í Herjólfsdal, þar á meðal fjórtán lögreglumenn. Hann segir að mótshaldarar muni mæta því ef ríkið heldur áfram að skera niður varðandi löggæslu á hátíðinni. „Ef lögreglan skæri þannig niður að það væri farið að skaða þetta umhverfi þá myndum við hugsa það, grafalvarlega,“ segir Páll Scheving Ingvarsson.