Eyjar.net - upplýsinga- og fréttamiðill um Vestmannaeyjar - Fréttir - Hamborgarafabrikkan mætir á Þjóðhátíð 2012

Hamborgarafabrikkan og Þjóðhátíð gengu nýverið til samstarfs og mun Hamborgarafabrikkan grilla Fabrikkuborgara í Herjólfsdal um Þjóðhátíðarhelgina.

„Það er sönn ánægja að fá Fabrikkuna í dalinn. Þjóðhátíðarnefnd er sífellt að leitast við að bjóða fjölbreyttari þjónustu fyrir Þjóðhátíðargesti og er þetta samstarf liður í því. Hefðbundnar veitingar verða að sjálfsögðu á sínum stað eftir sem áður, en tilkoma Fabrikkunnar er skemmtileg viðbót við framboð veitinga í dalnum“, segir Páll Scheving, formaður Þjóðhátíðarnefndar.
 

Hamborgarafabrikkan hefur komið sér upp grillbíl sem ætlar að heimsækja Þjóðhátíð í ár. Simmi og Jói, ásamt flokki úrvals grillara munu standa vaktina og grilla Fabrikkuborgara fyrir Þjóðhátíðargesti alla Þjóðhátíðarhelgina.

 

„Það er okkur á Fabrikkunni sannur heiður að fá að taka þátt í Þjóðhátíðinni. Við Jói verðum báðir á staðnum og ætlum að standa vaktina alla helgina. Fabrikkubíllinn er eiginlega bara Hamborgarafabrikkan á hjólum. Þetta er 20 ára gamall Econoline húsbíll með 460 vél undir húddinu. En eldhúsið í honum er fyrsta flokks, með alvöru gasgrilli og öllu tilheyrandi. Nú er bara að vona að grillbíllinn standi sig“, sagði Sigmar Vilhjálmsson, einn eigenda Hamborgarafabrikkunnar.

Í tilefni af samstarfinu verður sannkölluð Þjóðhátíðarstemning á Hamborgarafabrikkunni í Reykjavík í aðdraganda Þjóðhátíðar. Þar verður lifandi tónlistarflutningur en dagskráin verður kynnt á Facebook vef Hamborgarafabrikkunar: http://www.facebook.com/fabrikkan