Eyjar.net - upplýsinga- og fréttamiðill um Vestmannaeyjar - Fréttir - Hugsanlegt að eyjaflotinn sigli til Reykjavíkur á samstöðu fund áður en haldið er til veiða

Von er á fjölda fólks, af öllu landinu, á samstöðufund sem útvegsmannafélögin og starfsfólk í sjávarútvegi efna til á Austurvelli á morgun. Reiknað er með að áhafnir skipa í nokkrum byggðarlögum sigli til fundarins og að þau haldi síðan til veiða. Útvegsmenn ljúka því væntanlega aðgerðum sínum með fundinum.

 

Útgerðarmenn og sjómenn í Grindavík og Vestmannaeyjum ákveða í dag hvort siglt verður til fundarins í Reykjavík og umræður voru einnig um þennan möguleika á Snæfellsnesi.

 

Reiknað er með að skip á vegum útgerða Landssambands íslenskra útvegsmanna muni halda til veiða um kvöldið og á föstudag. Með því lýkur aðgerðum útvegsmanna sem ákveðnar voru til að vekja athygli á afleiðingum fiskveiðifrumvarpa ríkisstjórnarinnar fyrir fyrirtækin og starfsfólk þeirra.

 

„Ég tel að þessar breytingar gangi allt of skammt,“ segir Þorvarður Gunnarsson, forstjóri endurskoðunarfyrirtækisins Deloitte, um veiðigjaldafrumvarpið, en hann hefur verið að meta áhrif þess fyrir LÍÚ. Hann segir að þótt búið sé að sníða nokkra agnúa af séu þetta sömu frumvörpin og þau séu enn allt of íþyngjandi.