Eyjar.net - upplýsinga- og fréttamiðill um Vestmannaeyjar - Fréttir - Kallast rasismi á vinnumarkaði

„Auðvitað vil ég ekki vera að æsa mig við vini mína í Pepsi-mörkunum en þessi umræða er á villigötum," sagði Magnús Gylfason, þjálfari ÍBV, í viðtali við Valtý Björn Valtýsson í Boltanum á X-inu 97,7.

 

Hann er þá að tala um þá gagnrýni sem ÍBV hefur legið undir fyrir að hafa verið með sjö útlendinga í byrjunarliði sínu gegn KR í gær.

„Við eigum að hætta að pæla í því hvers lenskir mennirnir eru. Þetta er bannað á vinnumarkaði, það kallast rasismi. Auðvitað viljum við sjá að lið hafi blöndu af heimamönnum og uppöldum og allt þannig."

 

„Rétt er að sjö menn voru inn á með útlensk nöfn en þar af eru Matt Garner og Ian Jeffs sem hafa verið hérna í hátt í tíu ár. Eigum við ekki frekar að flokka þetta undir heimamenn og aðkomumenn?"

 

„Þá get ég talið upp fyrir þig: Andri Ólafsson, Þórarinn Ingi Valdimarsson og Tryggvi Guðmundsson voru meiddir. Þetta eru byrjunarliðsmenn. Víðir Þorvarðarson byrjaði inn á, Arnór Eyvar, Gauti Þorvarðar, Guðjón Orri, Bjarki og Yngvi voru á bekknum. Þarna eru níu uppaldir heimamenn. Bendið mér á önnur lið í deildinni sem hafa níu uppalda heimamenn. KR var með 2-3 í byrjunarliðinu í gær."

 

Magnús sagði að í sínum huga væri skiptingin hjá liðinu í mjög góðu jafnvægi en ÍBV hefur meðal annars fengið til sín erlenda leikmenn til að fylla upp í skörð meiddra lykilmanna liðsins.

 

Í viðtalinu var einnig rætt um vítaspyrnudómana í leiknum á KR-vellinum í gær en sérstaklega var Magnús Gylfason ósáttur við annan vítaspyrnudóminn sem KR fékk. Hann fór og ræddi við nafna sinn Þórisson sem dæmdi leikinn í gær.

 

„Það er nýmæli að við megum fara inn í dómaraklefa eftir leiki og ræða við dómarann, ég gerði það. Þar ítrekaði ég mitt mál og var mjög ósáttur og svekktur yfir því að dómgreindarleysi þeirra væri svona mikið. Þeir tóku vafaatriði og færðu það inn í teig, þeir bjuggu til atriði," sagði Magnús Gylfason.