Eyjar.net - upplýsinga- og fréttamiðill um Vestmannaeyjar - Fréttir - Hátíð í Eyjum við komu Heimaeyjar

Heimaey VE 1, nýtt skip Ísfélagsins í Vestmannaeyjum, er væntanleg til Eyja um hádegi á þriðjudag. Síðdegis á þriðjudag er ráðgert að skipið verði sýnt bæjarbúum og gestum. Skipið var smíðað í Asmar, skipasmíðastöð sjóhersins í Talcahuano skammt frá Concepcion í Síle, og er fyrsta nýja uppsjávarskipið sem bætist í íslenska flotann í mörg ár.

Ólafur Einarsson og áhöfn hans sigldu í gær norður Atlantshafið meðfram Ameríku eftir að hafa farið í gegnum Panama-skurðinn í síðustu viku og framhjá Bermúda-eyjum á mánudag. Heimferðin hefur gengið vel, að sögn Eyþórs Harðarsonar, útgerðarstjóra Ísfélagsins. Fyrirhugað er að Heimaey fari í fiskveiðiprufutúr 22. maí með mönnum frá skipasmíðastöðinni og sérfræðingum sem tengjast búnaði skipsins.

 

Samningar um smíði þess voru undirritaðir 1. nóvember 2007 og var upphaflega gert ráð fyrir að tvö skip yrðu smíðuð fyrir Ísfélagið. Eftir skjálftana í Síle í byrjun árs 2010 var hætt við smíði seinna skipsins, enda laskaðist skipasmíðastöðin verulega í skjálftunum og flóðbylgjunni sem fylgdi.