Eyjar.net - upplýsinga- og fréttamiðill um Vestmannaeyjar - Fréttir - 6 umferðaróhöpp í vikunni

Vikan var með rólegra móti hjá lögreglu en þó var nóg að gera í tengslum við það leiðindarveður sem gengið hefur yfir eyjarnar að undanförnu. Skemmtanahald helgarinnar fór ágætlega fram og engin alvarleg mál sem upp komu.

Að morgni 27. janúar sl. var lögreglu tilkynnt um að farið hafi verið inn í Íþróttamiðstöðina án þess þó að einhverjar skemmdir hafi orðið eða einhverju hafi verið stolið. Á eftirlitsmyndavélum má sjá dökkklæddann mann þarna inni um kl. 04:30 en greinilegt er að styggð hefur komið að honum þegar viðvörunarkerfi fór í gang og lét hann sig hverfa. Ekki er vitað hver þarna var á ferð en líklegt er að hægt verði að bera kennsl á hann á upptökum úr eftirlitsmyndavélunum.

 

Að kvöldi 29. janúar sl. var lögreglu tilkynnt um að rúða hafi verið brotin í stýrishúsi Bergs VE-44 og að greinilegt að sá eða þeir sem þarna voru á ferð hafi farið um skipið. Ekki gátu skipverjar séð að einhverju hafi verið stolið en eitthvað var rótað í skápum í brúnni. Talið er að farið hafi verið inn í skipið aðfaranótt sama dags en ekki er vitað hver eða hverjir þarna voru á ferð. Lögreglan óskar eftir upplýsingum um hvort einhver hafi orðið var við grunsamlegar mannaferðir á bryggjum bæjarins aðfaranótt sl. sunnudags.

 

Lögreglu var tilkynnt um 6 umferðaróhöpp í vikunni og má rekja flest þeirra til hálku og ófærðar sem er búin að vera á götum bæjarins að undanförnu. Engin slys urðu á fólki í þessum óhöppum en nokkuð tjón varð á ökutækjum.