Eyjar.net - upplýsinga- og fréttamiðill um Vestmannaeyjar - Fréttir - Þjóðin þolir ekki mistök

Nú á dögunum birtust í fjölmiðlum fjölmargar og áberandi áskoranir frá hagmunasamtökum í sjávarútvegi, fiskvinnslu, ýmsum sveitarfélögum, stjórn Alþýðusambands Íslands og fleirum. Áskoranirnar voru allar samhljóða og í þeim var skorað á þingmenn að íhuga vel hvort rétt væri að breyta fiskveiðistjórnunarkerfinu. Bent var sérstaklega á að þjóðin þyldi ekki mistök í því sambandi.

 

Ég held að það sé rétt að þjóðin þoli ekki mistök í nýrri lagasetningu um fiskveiðistjórnunarkerfið. Kerfi það sem nú er við lýði hefur skapað svo mikið ranglæti að nauðsynlegt er að ráðast í grundvallarbreytingar á því. Og þá þarf sannarlega að varast mistök.

En hvernig skal varast mistök? Hvað þarf að varast? Eða öllu heldur, hvað þarf nauðsynlega að vera í nýrri fiskveiðistjórnunarlöggjöf til þess að hún sé sanngjörn og réttlát? Mig langar að nefna hér nokkur atriði sem mér finnast skipta afar miklu máli.

Með skýrum hætti þarf að tryggja varanlegt eignarhald og forræði þjóðarinnar yfir auðlindum hafsins. Þjóðin á auðlindirnar og hún á í sameiningu að njóta arðsins af þeim. Auðlindirnar mega aldrei aftur vera á fárra manna höndum.

Uppræta þarf þá spillingu sem viðgengist hefur þegar menn geta tekið milljarða út úr sjávarútveginum og notað í alls konar gæluverkefni á sama tíma og sjávarbyggðunum blæðir.

Tryggja þarf nýliðun í sjávarútvegi, hleypa að greininni nýjum og áhugasömum aðilum, uppræta það leiguliðakerfi sem tíðkast hefur og komið hefur m.a. í veg fyrir sanngjarna og réttláta nýtingu auðlindarinnar.

Hér hef ég aðeins nefnt þrjú atriði en mun fleiri væri hægt að nefna því af nógu er að taka. Meginatriðið er að ný löggjöf taki mið af heildinni en sé ekki sniðin fyrir fáeina útvalda eins og því miður hefur verið raunin á allt of lengi þjóðinni til skaða. Það ranglæti og þau mistök þolir þjóðin ekki lengur.

 

Ragnar Óskarsson