Eyjar.net - upplýsinga- og fréttamiðill um Vestmannaeyjar - Fréttir - Landeyjahöfn er ekki fullbyggð

 

Í aðdraganda hönnunar og framkvæmdar var gengið út frá ákveðnum forsendum. Meðal þessara forsenda var að frátafir yrðu að hámarki 5 til 10% og að hægt yrði að sigla farþegaferju um höfnina í allt að 3,7 metra ölduhæð. Á þeim forsendum lýstu bæjarfulltrúar í Vestmannaeyjum yfir stuðningi við framkvæmdina.

 

Nú liggur það fyrri að núverandi framkvæmd hefur ekki dugað til að ná þessum markmiðum. Sandburður hefur verið meiri en búist var við og ýmis siglingatæknifræðileg vandkvæði komið upp. Vandinn hefur verið viðvarandi í langan tíma en enn liggja samt ekki fyrir lausnir. Öllum má ljóst vera að ráðherra samgöngumála og Siglingastofnun geta ekki firrað sig ábyrgð á því að framkvæmdin hafi ekki gengið eftir eins og stefnt var að. Á meðan höfnin virkar ekki sem skyldi stendur Siglingastofnun frammi fyrir því verkefni að finna lausnir á vandanum.

 

Lausnir kosta fjármagn og ábyrgð ráðherra samgöngumála og þingmanna Suðurlands er að tryggja fé til þessara óloknu verkefna. Hæg ættu heimatökin að vera enda er kostnaður við framkvæmdina nú eftir umtalsverðan kostnað vegna viðhaldsdýpkana vel innan kostnaðaráætlunar. Ábyrgð Siglingastofnunar er að leysa tæknilega það vandamál sem þeirra eigin hönnun á Landeyjahöfn er nú í.

 

Eyjamenn og Íslendingar allir hafa nú kynnst þeim gríðarlegu tækifærum sem felast í siglingum til Vestmannaeyja um Landeyjahöfn. Höfnin hefur alla burði til að verða bylting í samgöngum og búsetuþróun í Vestmannaeyjum og á Suðurlandi. Undirritaður vísar frá öllu tali um að framkvæmdin hafi verið misráðin frá upphafi og hafnar hugmyndum um að nýta höfnina einungis sem sumarhöfn. Í upphafi var okkur Eyjamönnum kynnt hugmynd um höfn sem orðið gæti framtíðar lausn og tryggt öruggar ferðir með einungis 5 til 10% frátöfum. Það er enn markmiðið. Fyrr er höfnin ekki fullbyggð.

 

 

 

Elliði Vignisson

Bæjarstjóri í Vestmannaeyjum