Eyjar.net - upplýsinga- og fréttamiðill um Vestmannaeyjar - Fréttir - Gunnar Heiðar skoraði eitt og lagði upp tvö

Gunnar Heiðar Þorvaldsson, knattspyrnumaður frá Vestmannaeyjum, skoraði eitt mark og lagði upp tvö fyrir sænska úrvalsdeildarliðið Norrköping í gær. Liðið vann þá sigur, 5:0, á varaliði spænska félagsins Real Mallorca en Gunnar er í æfingabúðum með Svíunum á Mallorca og dvelur þar með þeim til þriðjudags.

Gunnar gekk til liðs við ÍBV á dögunum eftir sex ár erlendis. Ólafur Garðarsson umboðsmaður staðfesti við Morgunblaðið í gær að Norrköping hefði mikinn áhuga á að fá Gunnar í sínar raðir. „Það er hins vegar að mörgu að hyggja fyrir Gunnar því hann er nýfluttur heim og kona hans á von á barni. Hann þarf því gott boð til að þau rífi sig upp á ný og fari til Svíþjóðar,“ sagði Ólafur.

 

Þess má geta að þjálfari Norrköping er sá sami og þjálfaði Halmstad þegar Gunnar Heiðar lék með liðinu árið 2005 og varð markakóngur sænsku úrvalsdeildarinnar.