Eyjar.net - upplýsinga- og fréttamiðill um Vestmannaeyjar - Fréttir - Vanar mikilvægum leikjum

„Þetta er bara spennandi. Við höfum aldrei verið í akkúrat svona stöðu áður með landsliðinu svo þetta er góð reynsla fyrir okkur,“ sagði Margrét Lára Viðarsdóttir, landsliðskona í knattspyrnu, í samtali við Morgunblaðið í gærkvöld. Ísland hefur sem kunnugt er komið mjög á óvart á hinu geysisterka Algarve-móti í Portúgal og unnið báða leiki sína til þessa, gegn Svíþjóð og Kína.

Því er svo komið að leikurinn við Danmörku í dag kl. 15 snýst um það hvort Ísland kemst í sjálfan úrslitaleik mótsins þar sem andstæðingurinn yrði Bandaríkin. Jafntefli gegn Danmörku myndi duga til þess en tapi íslenska liðið á það á hættu að spila jafnvel um 5. sætið í mótinu.

 

„Við höfum ekki riðið feitum hesti frá leikjunum við Danmörku síðustu ár, tapað þeim öllum, þannig að þetta verður erfitt. Við höfum ekkert verið að tapa þessum leikjum illa en lendum oft í miklum eltingaleik við þær því eins og Danir eru frægir fyrir þá halda þær boltanum mjög vel. En við ættum að vera farnar að þekkja þær vel núna og höfum fulla trú á að geta unnið þær,“ sagði Margrét Lára.

 

Nánar er rætt við Margréti Láru í íþróttablaði Morgunblaðsins í dag.