Eyjar.net - upplýsinga- og fréttamiðill um Vestmannaeyjar - Fréttir - Herjólfur hægði á sér í drullunni

Fyrsta ferð Herjólfs frá Vestmannaeyjum í morgun, sem átti að vera kl. 07:30 féll niður og óvíst er um framhaldið vegna mikils sands í Landeyjarhöfn.

 

Ívar Gunnlaugsson, skipstjóri Herjólfs, ákvað að sigla hvergi í morgun eftir að skipið tók niðri í síðustu ferðinni í gær. Hann segir að mikill sandur hafi borist inn í Landeyjarhöfn og utan við hana og hann hafi fundið vel fyrir því á leiðinni inn og út í gær.

Að sögn Ívars er málið í höndum Vegagerðarinnar, Eimskips og þeirra sem að málinu koma. „Þeir funda um málið og komast að einhverri niðurstöðu. Ég hef komist að minni niðurstöðu,“ segir hann og bætir við að hann fari síðan eftir því sem honum verði sagt að gera.

 

Landeyjarhöfn var formlega opnuð 21. júlí sl. Ferðir féllu niður á föstudag og laugardag og segir Ívar að þá hafi veðrið sett strik í reikninginn, en skipið hafi líka verið farið að haga sér einkennilega í innsiglingunni. „Ég var mjög meðvitaður um að þetta gæti verið að gerast,“ segir hann. „Hann rétt hægði á sér í drullunni.“