Eyjar.net - upplýsinga- og fréttamiðill um Vestmannaeyjar - Fréttir - Stúkan á Selfossi

Þetta hefur auðvitað verið stórkostlegt fyrir stuðningsmenn Selfoss-liðsins að ná að leggja Keflvíkinga að velli á vígsluleik á nýjum velli og með nýja stúku. Þetta gefur þeim byr undir báða vængi um sinn að minnsta kosti. Liðið er að spila í fyrsta sinn í úrvalsdeild og fá þarna stúku og völl að gjöf strax í upphafi. Ekki veit ég um skuldastöðu Selfossbæjar og kannski þurfa þeir að súpa seiðið af þessum ákvörðunum á næstu árum.

Þetta leiðir hugann að stúkumálum hér í Eyjum. Ég tel það vera okkar frábæra liði til framdráttar og stuðningsmönnum þeirra gott skjól þegar horft er á leiki liðsins að ráðist verði í byggingu stúku sunnan megin vallar fyrir kannski 500-700 áhorfendur. Ýmsir væru viljugir til að veita slíkri byggingu stuðning í verki og það mætti hugsa sér að verkið tæki nokkur ár til að unnt sé að safna aurum fyrir hvern verkþátt. Afhverju eiga stuðningsmenn ÍBV liðsins að vera með lélegustu aðstöðu allra liða í efstu deild, en liðið' hefur verið meðal þeirra bestu meira og minna síðustu áratugi og nokkrum sinnu hampað titlum ?