Eyjar.net - upplýsinga- og fréttamiðill um Vestmannaeyjar - Fréttir - Þorskkvótinn aukinn

Sjávarútvegsráðherra tilkynnti í morgun hversu mikið verður leyft að veiða af þorski á næsta fiskveiðiári. Samkvæmt því takmarkast þorskveiðar við 160 þúsund tonn á næsta fiskveiðiári. Það er 10 þúsund tonnum meira en á yfirstandandi fiskveiðiári.

Ýsuveiðar verða skornar niður um 13 þúsund tonn, niður í 50 þúsund tonn. Veiðar á úthafsrækju verða gerðar frjálsar, bæði kvótaeigendum og öðrum, en 7 þúsund tonna rækjukvóti hefur ekki verið fullnýttur á síðustu árum. Að öðru leyti eru veiðar svipaðar og á yfirstandandi ári, heldur meira í sumum tegundum og minna í öðrum. Gert er ráð fyrir að veiðigjald skili allt að 2,9 milljörðum króna í ríkissjóð en það er aukning frá um 14 milljónum á yfirstandandi ári. Lækkun olíu og hærra afurðaverð skýrir að mestu hækkunina en veiðigjald er ákvarðað út frá afkomu greinarinnar.

 

www.ruv.is