Eyjar.net - upplýsinga- og fréttamiðill um Vestmannaeyjar - Fréttir - Áhyggjur af vatnslögn til Eyja

Almannavarnarnefnd í Vestmannaeyjum hefur sent erindi til HS veitna þar sem lýst er yfir áhyggjum af vatnsforða Vestmannaeyinga í kjölfar jarðhræringa í Eyjafjallajökli.
Samkvæmt upplýsingum frá HS veitum er til neyðaráætlun vegna vatnsveitunnar og er hún tvíþætt. Annars vegar er mögulegt að ná vatni úr öðrum lindum ef tjón verður á vatnsbóli við Stóru Mörk, og er þar litið til vatns í Álunum og Fljótshlíðinni.

Áætlunin tekur hins vegar á möguleikum á viðgerð á lögninni ef hún skemmist. Einna mest er hættan ef flóð verður í Markarfljóti en fyrir átta árum voru vatnslagnirnar til Eyja færðar fimm metra undir fljótið til að fyrirbyggja tjón af völdum flóðs.